Ганна Марыя Эрэнстраль

Ганна Марыя Эрэнстраль (швед. Anna Maria Ehrenstrahl; нар. 4 верасня 1666 — 22 кастрычніка 1729)[7][8] — шведская мастачка ў стылі барока. Яна вядомая сваімі алегарычнымі карцінамі, партрэтамі і групавымі партрэтамі.

Біяграфія

Ганна Марыя Эрэнстраль была дачкой жывапісца Давіда Клокера Эрэнстраля[9] і Марыі Момы.[8]

У 1688 годзе яна выйшла замуж за Ёхана Ватранга (1652—1724), прэзідэнта апеляцыйнага суда Свеаланда.[8] Паводле законаў таго часу не было абавязаная браць прозвішча мужа і яна засталася вядомая пад прозвішчам Эрэнстраль. Пасля выхаду замуж стала хатняй гаспадыняй. З-за свайго багатага шлюбу ёй не давялося прафесійна маляваць, каб утрымліваць сябе, але яна працягвала маляваць усё сваё жыццё і часам прымала грошы за працу. Даследчыкі мяркуюць што яна была паважаным мастаком у сучаснікаў.[7]

Ганна Марыя Эрэнстраль з’яўлялася вучаніцай свайго бацькі. Выступала памочніцай ў яго творчасці, мела ўласную майстэрню ў доме бацькі.[7] Займалася напісаннем копій з палотнаў бацькі, у той час копіі мелі досыць каштоўны статус і іх напісанне з’яўлялася прыбытковай справай. Сярод створаных копій можна адзначыць копію партрэта шведскага караля Карла XI, напісанага яе бацькам ў 1676 годзе.

Як самастойны мастак пераняла асноўныя рысы творчасці свайго бацькі, пісала ў стылі барока адзінкавыя і групавыя партрэты людзей, часам жывёл. У дваццаць адзін год яна скончыла алегорыю чатырох сезонаў (1687) і алегорыю Амур і Псіхіка. Пазней стварыла партрэты прынца Фрэдрыка і прынца Карла Густава па даручэнні каралевы-удавы (1690), партрэт прынца Густава (1685), партрэт каралевы Даніі Ульрыкі Элеаноры і Аўроры Кёнігсмарк. Яна падрыхтавала групу партрэтаў шасці прэзідэнтаў апеляцыйнага суда Свеаланд: Магнуса Габрыэля Дэлагардзі, Густава Адольфа Дэлагардзі, Ларса Валенштэдта, Габрыэля Фалькенберга, Рэйнгольда Ёхана фон Ферсена і Карла Гіленстыерна (1717). Далей яна вырабляла партрэты членаў сям’і Ватранг і працавала ў гуашы з жывёламі.

У 1717 годзе Ганна Марыя Эрэнстраль перадала апеляцыйнаму суду Свеаланда шэсць сваіх карцін, на якіх намаляваны шэсць яе прэзідэнтаў. З гэтай нагоды пісьменніца Сафія Элізабэт Брэнер напісала ёй верш захаплення, у якім абедзве яны былі жанчынамі-піянерамі сваёй прафесіі ў Швецыі.[7]

Памерла ў Стакгольме 22 кастрычніка 1729 года ва ўзросце 63 гадоў.

Галерэя

• Кароль Швецыі Карл XII
• Карл XII у дзяцінстве
• Гедвіга Сафія Шведская
• Прынц Ульрык

Зноскі

1. 1 2 3 Sjöblom A. Anna Maria Ehrenstrahl — С. 380. Праверана 23 сакавіка 2017.
2. 1 2 Anna Maria Ehrenstrahl // GeneaStar
3. ↑ https://rkd.nl/explore/artists/44861 Праверана 15 кастрычніка 2016.
4. ↑ RKDartists Праверана 27 жніўня 2017.
5. ↑ Anna Maria Ehrenstrahl — 1917.
6. ↑ artist list of the National Museum of Sweden — 2016. Праверана 27 лютага 2016.
7. 1 2 3 4 En mamsell i akademien. Ulrica Fredrica Pasch och 1700-talets konstvärld. av Anna Lena Lindberg, Stockholm: Signum, 2010. ISBN 978-91-86221-05-8
8. 1 2 3 Anna Maria Ehrenstrahl, <urn:sbl:16717>, Svenskt biografiskt lexikon (art av Axel Sjöblom.), hämtad 2015-02-07.
9. ↑ Wilhelmina Stålberg; P. G. Berg (1864). “Ehrenstrah, Anna Maria” (in Swedish). Anteckningar om svenska qvinnor. Stockholm: P.G. Berg. p. 121. http://runeberg.org/sqvinnor/0147.html. Retrieved on September 1, 2014.

Літаратура

• Carin Österberg; Inga Lewenhaupt; Anna-Greta Wahlberg (1990) (in Swedish). Svenska kvinnor: föregångare, nyskapare. Signum. ISBN 978-91-87896-03-3. https://books.google.com/books?id=hG8TAgAACAAJ.
• Svenskt Konstnärslexikon. Allhems Förlag.