Серафім Антонавіч Андраюк
У Вікіпедыі ёсць артыкулы пра іншых асоб з прозвішчам Андраюк. Серафім Антонавіч Андраюк (10 сакавіка 1933, в. Градзялі, Беластоцкае ваяводства, Польская Рэспубліка — 4 красавіка 2022) — беларускі літаратуразнавец[1].
Біяграфія
Нарадзіўся 10 сакавіка 1933 года ў Градзялі Беластоцкага ваяводства Польскай Рэспублікі ў сялянскай сям’і. У 1945 годзе разам з бацькамі пераехаў у в. Бербашы Карэліцкага раёна Гарадзенскай вобласці.
У 1957 годзе скончыў аддзяленне беларускай мовы і літаратуры БДУ[1]. Працаваў выкладчыкам у Крываносаўскай сярэдняй школе Старадарожскага раёна Мінскай вобл. У 1965 годзе скончыў аспірантуру пры Інстытуце літаратуры імя Янкі Купалы АН БССР. У 1966—1981 гадах — навуковы супрацоўнік гэтага інстытута[1]. У 1981—1993 гадах — галоўны рэдактар, у 1993—1996 гадах дырэктар выдавецтва «Мастацкая літаратура»[1]. Кандыдат філалагічных навук. Член Саюза пісьменнікаў СССР (з 1972). Жыў у Мінску.
Памёр 4 красавіка 2022 года[2].
Творчасць
Дэбютаваў у друку як крытык і літаратуразнавец з 1964 года. Друкаваў рэцэнзіі і артыкулы па пытаннях гісторыі беларускай савецкай літаратуры і сучаснага літаратуранага працэсу[1]. Выдаў манаграфіі «Жыццё. Літаратура. Героі» (1973), «Традыцыі і сучаснасць» (1981), зборнікі крытычных артыкулаў «Вывяраючы жыццём» (1976), «Жыць чалавекам» (1983), нарыс творчасці І. Пташнікава «Чалавек на зямлі» (1988), кнігу «Стыль пісьменніка» (1974)[1]. Адзін з аўтараў «Истории белорусской советской литературы» (1977).
Узнагароды
- Літаратурная прэмія СП БССР імя І. Мележа (1984) за кнігу «Жыць чалавекам».
Зноскі
- 1 2 3 4 5 6 Андреюк Серафим Антонович // Биографический справочник. — Мн.: «Белорусская советская энциклопедия» имени Петруся Бровки, 1982. — Т. 5. — С. 19. — 737 с..
- ↑ Памёр беларускі літаратуразнавец Серафім Андраюк
Літаратура
- Андраюк Серафім // Беларускія пісьменнікі (1917—1990): Даведнік / Склад. А. К. Гардзіцкі. Нав. рэд. А. Л. Верабей. — Мн.: Мастацкая літаратура, 1994. — 653 с.: іл. — ISBN 5-340-00709-X.
- Андраюк Серафім // Беларускія пісьменнікі: Біябібліяграфічны слоўнік. У 6 т. / пад рэд. А. І. Мальдзіса. — Мн.: Беларуская Энцыклапедыя, 1992—1995.
- Чыгрын С. Серафім Андраюк. Даследчык беларускай прозы і крытыкі // З беластоцкай зямлі / Пад.рэд. Я.Вапы — Białystok: Offset Print, 2008. 308 с. ISBN 978-83-925904-5-3.